بلدنا.....بلد شهادات

بسم الله الرحمن الرحيم

أنا مش عارف ابدأ منين بس الواحد ممكن يتكلم عن حاجات كتير فى حياته كان عايشها أو نفسه يعيشها يعنى مثلآ الواحد هو وصغير كان كل همه انه يلعب كوره شويه ومش فارقه معاه يزاكر او حتى يبقى حاجه كويسه بس دايمآ لما كنا بنتسأل تطلع ايه كانت دايمآ الاجابه بتتلخص فى حاجتين دكتور أو مهندس ولو حد فكر يبقى بعيد عن حاجه من الاتنين يبقى ظابط متعرفش ايه الفكره فى التخصصات دى يمكن علشان البلد بتحترم الناس دى اكتر من أى حد تانى أو يمكن الناس نفسها بتحترم الناس اللى من النوعيه دى وبتفضل تقولهم يابيه وحضرتك وأوامر ساعتك ف بيسيطر علينا وعلى اهالينا حاجه معينه انك يا تبقى كده او كده مع ان فى ناس كتير تانيه دورها مهم فى حياتنا ومينفعش ان احنا نعيش من غيرها زى اقرب مثال الراجل اللى  بينضف شوارعنا واحنا نيجى نقول عليه زبال وحتى مش بتحترمه ولا كدوله ولا شعب ... أنا الحمد لله بقيت مهندس وده بفضل ربنا بس انا نفسى زى ما الناس بتحترمنى او بتحترم اى حد عنده وظيفه زى كده تحترم الناس البسيطه دى احنا مينفعش كلنا نبقى مهندسين ولا ينفع نبقى كلنا أطباء احنا عباره عن سلسله متكونه من حلقات كل حلقه فيها بتكمل التانيه لو فى واحده اتفكت تبوظ السلسله ....لازم نتعلم نحترم بعض ونبقى متماسكين مش مهم أنا بشتغل ايه ولا معايا شهاده ايه والله لو احترمنا بعض وعرفنا ان احنا مينفعش كل واحد فينا يعيش من غير التانى هنبقى احسن بلد فى الدنيا احنا مشاكلنا فعلا كتيره بس بجد بسيطه جدآ وبتتلخص فى انا احنا بقينا مش قادرين نفهم بعض ,نحب بعض ,نخاف على بعض ياريت نبقى ايد واحده انا مش عارف ازاى خرجت من موضوع ودخلت فى موضوع تانى بس حسيت انى لازم اتكلم عن البللد اللى كل يوم حالها بيسوء ا كتر من الاول وبقينا كل شويه نترحم على الماضى مره نقول ياريتنا ماكناعملنا ثوره ولا شيلنا مبارك كان حالنا احسن وقتها وبعدين نرجع تانى نقول بس مرسى ناوى يعمل شخصيه ويعمل مواطن مصرى فى كل انحاء وارجاء العالم وجينا طبعآ حسينا ان مرسى مش بيعمل حاجه نزلنا تانى وعملنا ثوره تانيه ودلوقتى بنترحم على حالنا ايام مرسى وبنقول على الاقل فى ايامه كانت الاسعار كويسه وعمرها ما ارتفعت بالشكل ده ف انا شايف الحل ان احنا نتكاتف شويه ونقف جنب بعض مش مهم نا تبع مين ولا مع مين ولا ضد مين مش مهم انى اختلف معاك بالعكس ده الاختلاف وتزاحم الافكار بيطلع حلول لمشاكلنا جايز لما نختلف مع بعض ناخد بالنا من حاجات احنا مش واخدين بالنا منها وربنا معانا ويكرمنا ان شاء الله..

عايز ارآئكم ولو فى حاجه مش عاجبكم قولولى عليها اتمنى التواصل ورأيكم يهمنى لان دى اول حاجه اكتبها ف ياريت تساندونى اشكركم على سعة صدوركم واتمنى مكونش طولت عليكم ولا ضايقت حد من اى طرف او فصيل معبن او حزب ما.